Subvencións a concellos,mancomunidades de concellos e consorcios locais, para a realización de programas de integración da poboación inmigrante extracomunitaria en Galicia, durante o ano 2008

A Comunidade Autónoma galega participa nos últimos anos do crecemento que a poboación inmigrante extracomunitaria está a experimentar en España. O incremento desta poboación e a necesidade de abordar esta nova realidade é polo que cómpre levar a cabo o desenvolvemento de políticas de apoio á inmigración que permitan incrementar os esforzos humanos e orzamentarios dedicados aos procesos da súa integración.

Non pode descoñecerse que a integración en materia de inmigración require a participación de todos os axentes implicados, tanto públicos como privados, pero é salientable o papel que desempeñan os entes locais no desenvolvemento de programas de integración, polo que, a través desta resolución, se regula a concesión de axudas, en concorrencia competitiva, a concellos, mancomunidades de concellos e consorcios locais para a realización de programas destinados a favorecer os procesos de integración da poboación inmigrante extracomunitaria e conseguir a súa incorporación e participación en todos os ámbitos da sociedade galega.

Neste contexto, a Secretaría Xeral de Emigración, como o órgano superior da Administración da comunidade autónoma ao que lle corresponden, entre outras, as competencias en política inmigratoria en Galicia, así como a xestión de todos os procedementos que desas materias deriven, publica a resolución que a continuación sigue.

Resolución

Resolución do 5 de marzo de 2008, da Secretaría Xeral de Emigración, pola que se regula a concesión, en réxime de concorrencia competitiva, de subvencións a concellos, mancomunidades de concellos e consorcios locais, para a realización de programas destinados a favorecer os procesos de integración da poboación inmigrante extracomunitaria na Comunidade Autónoma galega, durante o ano 2008.

Convocatoria

Diario Oficial de Galicia, do 12 de marzo de 2008

Obxecto

O obxecto da resolución é regular os requisitos e condicións para a concesión, en réxime de concorrencia competitiva, de subvencións a concellos, mancomunidades de concellos e consorcios locais para a realización de programas destinados a favorecer os procesos de integración da poboación inmigrante extracomunitaria na Comunidade Autónoma galega, así como o seu reforzo educativo, no ano 2008, dentro dos seguintes eixes:

• Eixe de Educación
• Eixe de emprego
• Eixe de vivenda
• Eixe de servizos sociais
• Eixe de muller
• Eixe de sensibilización

Destinatarios

Concellos, mancomunidades de concellos e consorcios locais que cumpran os requisitos establecidos na resolución. Estes programas ou accións poderán ser xestionados directamente polos concellos ou poden ser obxecto dunha xestión indirecta a través doutras entidades ou asociacións colaboradoras sen ánimo de lucro.

Importe total do programa

1.060.000 €, repartidos por eixes da seguinte forma:

• Eixe de Educación: 200.000 €
• Eixe de emprego: 200.000 €
• Eixe de vivenda: 125.000 €
• Eixe de servizos sociais: 200.000 €
• Eixe de muller: 185.000 €
• Eixe de sensibilización: 150.000 €
  

Prazo de presentación

Ata o 14 de abril de 2008

Solicitudes

As solicitudes e documentación correspondente remitiranse a:

• Secretaría Xeral de Emigración.
  Rúa dos Basquiños,2
  15781 Santiago de Compostela (A Coruña).

Ano

2008

Información adicional

Consultar a resolución.

Guía do cidadán