Homologación / Convalidación de estudios

a. De Educación Non Universitaria

Homologación

Supón a declaración de equivalencia dos títulos, diplomas ou estudos estranxeiros cos españois, para os efectos académicos e profesionais.

Convalidación

Supón a declaración de equivalencia de estudos estranxeiros (cursos, módulos...) para os efectos de continuar os estudos nun centro docente español

Solicitude

Os expedientes de convalidación e homologación iniciaranse a instancia do interesado, mediante solicitude axustada ao modelo oficial, dirixida ao titular do Ministerio de Educación e Ciencia, que se presentará preferentemente:

• Na Subdelegación do Goberno ou na Dirección Provincial do Ministerio ou Área Funcional de Alta Inspección de Educación da Delegación do Goberno da provincia ou Comunidade Autónoma onde vaia a residir o interesado.
• Nos Rexistros Auxiliares do Ministerio de Educación e Ciencia ou no Rexistro Xeral.
• Na Consellería de Educación da Embaixada de España ou na Oficina Consular correspondente ao lugar de residencia do interesado, no caso de españois residentes no estranxeiro.

Documentación

As solicitudes deberán ir acompañadas dos documentos seguintes:

• Título ou diploma oficial, cuxa homologación se solicita ou, de selo caso, certificación oficial acreditativa da superación dos exames oficiais correspondentes.
• Certificación académica oficial dos cursos realizados na que consten as asignaturas cursadas, as cualificacións obtidas e os anos académicos nos que se realizaron os cursos respectivos.
• Acreditación de aboamento da taxa correspondente, agás que se solicite homologación ao título de Graduado Escolar en Educación Secundaria.
• Toda documentación que poda contribuír a unha mellor análise do expediente. Aconséllase a presentación de programas e carga horaria lectiva para os estudos de formación profesional ou de ensinanzas especiais (artísticas, idiomas).

Os documentos expedidos no estranxeiro deberán estar legalizados e ir acompañados, no seu caso, da correspondente tradución oficial ao castelán. Na Alta Inspección de Educación en Galicia para títulos non universitarios, excepto os de formación profesional, non se esixe tradución do portugués, francés e italiano. Non se esixe a legalización dos documentos expedidos polas autoridades académicas dos países da Unión Europea, acreditativos de estudos realizados en ditos países.

Estudos que non precisan convalidación

Non deberá facerse ningún trámite de convalidación de estudos cando se trate de alumnos procedentes de sistemas educativos estranxeiros que desexen incorporarse a calquera dos cursos que integran en España a Educación Primaria ou da Educación Secundaria Obrigatoria.

Resolución

A competencia para resolver os expedientes de convalidación e homologación corresponden ao Ministerio de Educación e Ciencia.

Os centros docentes poderán admitir, con carácter adicional, a aqueles alumnos con expedientes de homologación ou convalidación, iniciados e pendentes de resolución nas datas en que finalicen os prazos de admisión.

b. De Educación Superior

Homologación

A homologación supón o recoñecemento da validez oficial, para os efectos académicos e profesionais, de títulos superiores cursados en Universidades estranxeiras.

Solicitude

O expediente iniciarase a instancia do interesado, mediante solicitude axustada ao modelo oficial, dirixida ao titular do Ministerio de Educación e Ciencia, que se presentará, preferentemente, nos Rexistros Auxiliares do Ministerio ou no Rexistro Xeral.

A competencia para resolver os expedientes de homologación corresponde ao Ministerio de Educación e Ciencia.

Documentación

As solicitudes deberán ir acompañadas dos documentos seguintes:

• Certificación acreditativa da nacionalidade do solicitante, expedida polas autoridades competentes do seu país, que pode ser substituída por copia compulsada do pasaporte ou do permiso de residencia en España, ou, no caso dos cidadáns españois, por unha fotocopia compulsada do DNI.
• Fotocopia compulsada do título cuxa homologación se solicita ou da certificación acreditativa da súa expedición.
• Fotocopia compulsada da certificación académica dos estudios realizados para a obtención do título na que consten a duración destes, as asignaturas cursadas e a carga horaria de cada unha delas.

Cando se trate dunha homologación de títulos de doutorado, deberanse achegar ademais dos documentos anteriormente sinalados, os seguintes:

• Memoria explicativa da tese realizada, redactada en castelán, así como un exemplar da mesma (non é necesaria a súa tradución ó castelán), membros que compuxeron o xurado da tese e cualificación obtida.
• En calquera caso, a documentación achegada pode completarse co curriculum vitae académico e científico do solicitante e cos programas correspondentes das asignaturas, onde se reflicta o contido e a amplitude das mesmas.
• Ademais poderá presentarse toda documentación complementaria que o interesado estime oportuna.
• Os documentos expedidos no estranxeiro deben ser oficiais, expedido polas autoridades competentes e legalizados por vía diplomática, debendo ir acompañados, no seu caso, pola tradución oficial ao castelán. Non se esixe a legalización dos documentos expedidos polas autoridades académicas dos países da Unión Europea, ou signatarios do Acordo sobre o Espazo Económico Europeo, acreditativos de estudos realizados en estes países.

Resolución

A competencia para resolver os expedientes de homologación corresponde ao Ministerio de Educación e Ciencia.

Convalidación

A convalidación de asignaturas cursadas en universidades estranxeiras ten que cumprir uns determinados requisitos. Son os propios Centros universitarios os que establecen eses requisitos e conceden as convalidacións.

+ información: Ministerio de Educación e Ciencia.

LEMBRE: os documentos das Universidades estranxeiras deben estar legalizados por vía diplomática (Embaixadas ou Consulados de España, Ministerio de Eduación , Ministerio de Asuntos Exteriores de España). Os documentos selados coa apostilla non necesitan ningunha outra legalización diplomática ou consular. Este requisito non se esixirá aos documentos expedidos polas autoridades dos estados membros da Unión Europea ou signatarios do Acordo sobre o Espazo Económico Europeo. Todos os documentos deben entregarse coa súa correspondente tradución oficial ao castelán.

Voltar